Vardum da chí, vardum da lá
Sém sémpru dré a guardá
Vardum ul cél, vardum la tèra
Vardum la gént che crépa in guèra
E vardum tücc, dai vécc ai fiöö
Vardavum iér e vardum incöö
Vardum i dònn cui pelizz e i bursétt
Ga guardum ul cüü, i gamb e pö i tétt
Però se a sigüitat a vardái bén
Parli mía di tétt, o brütt deficént
Mi parli di öcc istriaa e prufund
Che i ènn la pòrta par un altru mund
Se scavat dénta quii di persónn
I ciapitt culuraa gh’ann sura ul tò nóm
Ta riflètan la giòia, sperlüsissan d’amúr
Ta taian da lacrim e spüdan dulúr
Vöri cüntatt sü da quand sévi gió al bar
E la gént la cantava “Whiskey in the Jar”
A gh’éva lí un óm setaa gió cul cichétt
Che l ma sbiutava con düü öcc pinitt
Pö u capii se l’éva dré a fá
Cumpagn da mí l’éva dré a vardá
Che cribiu! Quéll óm, si pròpi quéll lí,
L’a vist ul böcc che gh’u dénta mí
Par finí vöri mía fá una murál
Parchè da murál gh’u giamò piée i ball
Ma vöri dumá ditt dó paròll biótt
Che i spiégan tücós e i spiégan nagótt:
Se un dí vedarét in cél la Madòna,
O Sant’Apulònia e Santa Maradóna,
Fa ul ségn dala crus e métas in ginöcc
E regòrdas che i ét, i ét vist tí cui öcc